Dy ose tre orë gjumë të humbur gjatë ditëve të javës mund të duken si një sakrificë e vogël, një humbje që mendojmë se do ta kompensojmë gjatë fundjavës.
Por sipas një studimi të ri nga Universiteti i Pensilvanisë, i publikuar në Psychosomatic Medicine, ndikimi i gjumit “të prishur” do të shihet në shëndetin kardiovaskular vite më vonë.
“Disa goditje të njëpasnjëshme ndaj shëndetit kardiovaskular ndërsa jeni i ri mund ta bëjnë zemrën më të ndjeshme ndaj sëmundjeve kardiovaskulare më vonë në jetë,” tha Anne-Marie Chang, profesoreshë e asociuar e Shëndetit Bio-Sjelljes dhe një nga autorët e studimit. Gjetjet treguan se disa masa të shëndetit kardiovaskular, duke përfshirë rrahjet e zemrës dhe presionin e gjakut, tregojnë tendenca përkeqësuese gjatë javës kur gjumi i natës është i kufizuar në 5 orë. Siç theksuan studiuesit, këto janë efekte që gjumi i fundjavës nuk mund t’i kthejë.
Procedura eksperimentale që përfshinte 15 burra të shëndetshëm të moshës 20 deri në 35 vjeç zgjati 11 ditë dhe u nda në tre faza:
-Tre netët e para u lejuan deri në 10 orë gjumë nate për të vendosur një nivel bazë gjumi;
-Gjatë pesë netëve të ardhshme, të gjithë pjesëmarrësit ishin të kufizuar në pesë orë gjumë,
-Një periudhë rikuperimi në dy netët e fundit, kur u lejua përsëri deri në 10 orë gjumë.
Për të vlerësuar efektet e ndryshimeve në zakonet e gjumit në shëndetin kardiovaskular, studiuesit matën pulsin dhe presionin e gjakut të pjesëmarrësve çdo dy orë gjatë ditës, një frekuencë që e bën studimin “unik” sipas Dr. Chang. Rezultatet treguan se:
-Rrahjet e zemrës u rritën me pothuajse një rrahje në minutë (BPM) në çdo ditë të njëpasnjëshme të studimit.
-Në veçanti, frekuenca mesatare bazë e zemrës ishte 69 BPM dhe gati 78 BPM deri në fund të studimit në ditën e dytë të rikuperimit.
-Presioni i gjakut sistolik u rrit me rreth 0,5 mmHg (milimetra merkur) në ditë.
-Presioni mesatar bazë i gjakut sistolik arriti në 116 mmHg dhe ishte gati 119.5 mmHg në fund të periudhës së rikuperimit.
“Si rrahjet e zemrës dhe presioni sistolik i gjakut u rritën ditë pas dite për shkak të mungesës së gjumit dhe nuk u kthyen në nivelet bazë deri në fund të periudhës së rikuperimit. Pra, pavarësisht se kishin mundësi shtesë për të pushuar, sistemet e tyre kardiovaskulare ende nuk ishin rikuperuar”, komentoi studenti i diplomuar i Universitetit të Pensilvanisë dhe anëtari i ekipit David Reichenberger.
Mund të nevojiten periudha më të gjata të rikuperimit të gjumit sesa një fundjavë, përfundoi Reichenberger, duke theksuar rëndësinë e gjumit si një faktor që ndikon në shëndetin kardiovaskular, peshën, shëndetin mendor, aftësinë për t’u përqëndruar dhe për të mbajtur marrëdhënie të shëndetshme shoqërore.
Top Channel
