Përpjekjet për zgjidhje me diplomaci të mosmarrëveshjeve për kufijtë detarë mes Turqisë dhe Greqisë janë në pikën më të ulët se kurrë. Presidenti turk Rexhep Taip Erdogan njoftoi para parlamentit të vendit, fundin e bisedimeve me palën greke, të nisura vitin e kaluar.
Erdogan tha të mërkurën se vendi po pezullon bisedimet me Greqinë, pjesërisht për shkak të një mosmarrëveshjeje me kryeministrin grek Kyriakos Mitsotakis dhe asaj që Ankaraja e quan shkelje të hapësirës ajrore.
Vitin e kaluar, pas një ndërprerjeje pesëvjeçare, dy anëtarët e NATO-s rifilluan bisedimet për zgjidhjen e problemeve në Mesdhe dhe çështje të tjera dypalëshe.
Erdogan i tha parlamentit se Turqia kishte anuluar një platformë për bashkëpunim dypalësh me Greqinë, të quajtur Këshilli Strategjik i Nivelit të Lartë, duke shtuar se Ankaraja dëshironte një politikë të jashtme që “ka një karakter të fortë”.
“Ju po na tregoni(të kundërtën) vazhdimisht me avionët tuaj”, tha ai, duke iu referuar mosmarrëveshjes së hapësirës ajrore mbi ishujt në detin Egje.
Ai paralajmëroi Greqinë të mos përpiqet të luajë me Turqinë. “Mos bëni lojëra me Turqinë se do të lodheni e do mbeteni rrugëve. Ne nuk po zhvillojmë më bisedime dypalëshe me ju”, tha presidenti turk.
Vendet kanë qenë prej kohësh në mosmarrëveshje për një sërë çështjesh si kufijtë detarë, pretendimet e mbivendosura rreth brezave të tyre kontinentalë, hapësirën ajrore, emigrantët dhe Qipron e ndarë etnikisht.
Tensionet shpërthyen përsëri javën e kaluar kur Erdogan tha se kryeministri grek “nuk ekziston më” për të, duke e akuzuar atë se po përpiqej të bllokonte shitjen e avionëve luftarakë F-16 në Turqi gjatë një vizite në Shtetet e Bashkuara.
Mitsotakis tha të martën, pas një samiti të liderëve të Bashkimit Evropian, se ai kishte informuar kolegët e BE-së për “agresivitetin” e Turqisë dhe “provokimet që Greqia apo BE-ja nuk mund t’i tolerojnë”.
