Dëshmitarët që i mbijetuan një rrëmuje vdekjeprurëse të Halloween-it në Seul, kanë folur për tmerrin që panë.
Të paktën 154 persona u vranë kur turmat u mblodhën për të festuar në lagjen Itaewon të kryeqytetit të Koresë së Jugut.
“Njerëzit filluan të shtyjnë nga pas, ishte si një valë – asgjë nuk mund të bëhej,” tha Nuhyil Ahammed për BBC.
“Nuk mund të flija natën e kaluar. Unë ende mund të shoh njerëz që vdesin para syve të mi,” tha ai.
32-vjeçari, i cili foli për BBC këtë pasdite, tha se ishte kapur në rrëmujë dhe se askush nuk mund të bënte asgjë për të shpëtuar të tjerët ose veten e tyre.
Ahammed është një punonjës IT nga India që jeton në Seul dhe tha se ka marrë pjesë në festën e Halloween për pesë vitet e fundit.
Vitin e kaluar kishte më shumë policë në zonë, tha ai, por turma e këtij viti nuk ngjante me asgjë që kishte përjetuar më parë.
Ahammed ishte me miqtë në festë dhe tha se nuk i kujtohej pse donin të hynin në rrugicën ku ndodhi rrëmuja, përveç se ishte një vend grumbullimi popullor për festuesit.
“E kuptova se diçka nuk shkonte. Kisha frikë se diçka do të ndodhte,” tha ai.
Ai tha se u rrëzua, por arriti të shkonte drejt shkallëve përgjatë anës së rrugicës.
“Njerëzit po mbyten, bërtisnin… binin… kishte shumë njerëz. Unë isha në shkallët, vetëm shikoja gjithçka që po ndodhte. Njerëzit nuk dinin çfarë të bënin dhe ne nuk dinim si të ndihmonim ”, tha ai.
Ai ishte i shqetësuar për miqtë e tij dhe u përpoq t’i telefononte, por ata nuk u përgjigjën. Më vonë ai zbuloi se ata arritën të largoheshin.
Ministria e Brendshme dhe Sigurisë e Koresë Jugore njoftoi se të paktën 26 shtetas të huaj humbën jetën në tragjedi. Ministria tha se po merr të gjitha masat për të ofruar mbështetje për të afërmit e viktimave të huaja të vrarë në katastrofë, si lejimi i hyrjes në Korenë Jugore dhe ndihma për organizimin e funeralit.
Top Channel
