KOPENHAGË, 20 shkurt /ATSH-DPA/ – Kryeministri suedez Ulf Kristersson do të udhëtojë për në Budapest përpara miratimit të shpresuar nga parlamenti hungarez, pengesa e fundit për hyrjen e kombit skandinav në NATO.
Me ftesë të kryeministrit Viktor Orbán, Kristersson do të vizitojë kryeqytetin hungarez, njoftoi qeveria suedeze.
Axhenda e dy liderëve përfshin bisedimet për bashkëpunimin në politikën e sigurisë dhe mbrojtjes dhe përgatitjet për presidencën e ardhshme hungareze të Këshillit të BE-së. Takimi do të pasohet nga një konferencë e përbashkët për shtyp.
Suedia po përpiqet që aplikimi i saj në NATO të ratifikohet nga Hungaria, e cila është i vetmi vend i mbetur nga 31 anëtarët e aleancës së mbrojtjes që nuk e ka pranuar ende anëtarësimin e Suedisë.
Kohët e fundit, përfaqësuesit e partisë hungareze në pushtet Fidesz e kishin bërë kusht për ratifikimin vizitën e Kristersson në Budapest.
Udhëheqësi suedez dukej i hapur për një udhëtim të tillë, por tregoi se një vizitë pas ratifikimit të NATO-s do të kishte më shumë kuptim.
Parlamenti hungarez pritet të miratojë të hënën anëtarësimin e Suedisë në NATO: kreu i grupit parlamentar Fidesz, Máté Kocsis, ka kërkuar që kjo çështje të vendoset në rendin e ditës të seancës plenare të sotme. /os/
,