BRUKSEL, 29 janar /ATSH-ANSA/ – Federata e Fermerëve të Rinj të Belgjikës (Fja) kërcënon me bllokadë totale të Brukselit “në ditët në vijim”, duke thënë se është “e vendosur të intensifikojë demonstratat dhe duke mos përjashtuar bllokimin e qendrave të shpërndarjes në shkallë të gjerë’’.
Federata nuk ka shpallur ende një datë për fillimin e bllokimit total të kryeqytetit, por tregon se “mund të ndodhë që të mërkurën ose të enjten”.
Ditët e fundit, fermerët belgë kishin shprehur tashmë gatishmërinë e tyre për t’u mobilizuar me traktorë në Bruksel të enjten më 1 shkurt, që përkon me samitin e jashtëzakonshëm të liderëve të BE-së. /os/
