VARSHAVË, 23 shkurt /ATSH-DPA/- Bashkimi Evropian do të lirojë 137 miliardë euro nga fondet që po i mbahen Polonisë për shkak të shqetësimeve për ligjin e së drejtës, tha sot presidentja e Komisionit Evropian, Ursula von der Leyen.
“Javën e ardhshme, komisioni do të dalë me dy vendime për fondet evropiane që aktualisht janë të bllokuara për Poloninë”, tha Von der Leyen në një konferencë për shtyp në Varshavë.
“Këto vendime do të lirojnë 137 miliardë euro për Poloninë”, shtoi ajo.
Shqetësimet rreth reformave gjyqësore nën drejtimin e qeverisë së mëparshme nacionaliste të Polonisë e shtynë komisionin të ndalonte fondin nga buxheti i BE-së që normalisht do të ishin shpenzuar për Poloninë.
Por në tetor, Partia nacionaliste Ligj dhe Drejtësi (PiS) u rrëzua nga një koalicion centrist i kryesuar nga ish-presidenti i Këshillit Evropian Donald Tusk, i cili ka kërkuar të zhbëjë ndryshimet e bëra nga PiS dhe të rivendosë fondet e Polonisë nga BE-ja.
Në një takim të martën në Bruksel, ministri i ri i Drejtësisë i Polonisë, Adam Bodnar parashtroi planin e reformës gjyqësore të qeverisë së re për ministrat e Çështjeve Evropiane të vendeve anëtare.
“Unë mirëpres fuqimisht planin e veprimit që qeveria juaj prezantoi para vendeve anëtare këtë javë. Kjo është një deklaratë e fuqishme, një udhërrëfyes i qartë për Poloninë dhe përpjekjet tuaja janë vendimtare|”, tha Von der Leyen në Poloni duke iu drejtuar Tusk.
“137 miliardë euro do të garantohen nga Prokurori Publik Evropian. Ky është një lajm i madh për popullin polak dhe për Evropën, dhe kjo është arritja juaj”, tha ajo.
“Paratë do të sigurohen nga dy burime, buxheti i kohezionit të BE-së, i cili paguan për zhvillimin rajonal, dhe një fond i veçantë i krijuar për të ndihmuar ekonominë e BE-së të rimëkëmbet nga efektet e kufizimeve të Covid-19”, tha Von der Leyen. //a.i/
