KIEV, 27 prill /ATSH-DPA/- Të paktën katër centrale u dëmtuan pasi Rusia shënjestroi sërish Ukrainën me një raund sulmesh masive ajrore gjatë natës, njoftoi sot operatori.
“Nga 32 raketa të lëshuara nga ajri, Deti i Zi dhe toka, 21 u kapën”, thanë Forcat Ajrore të Ukrainës.
“Disa persona u plagosën në objektet e dëmtuara të energjisë”, tha operatori DTEK, duke shtuar se punëtorët po përpiqeshin të riparonin dëmet.
“Sirenat e sulmit ajror u dëgjuan në të gjithë vendin përpara sulmeve ruse që kishin shënjestruar kryesisht centralet”, sipas Ministrisë së Energjisë në Kiev.
Autoritetet thanë se dy centrale u goditën në rajonin juglindor të Dnipropetrovsk, në qendrën industriale të vendit.
Sulme u raportuan gjithashtu në rajonet perëndimore, Lviv dhe Ivano-Frankivsk.
Autoritetet raportuan gjithashtu shpërthime në Kharkiv, qyteti verilindor pranë kufirit rus, i cili ka qenë vazhdimisht objektivi i sulmeve këto javët e fundit.
Rusia, e cila filloi pushtimin në shkallë të plotë të Ukrainës fqinje më shumë se dy vjet më parë, ishte gjithashtu në shënjestër të sulmeve gjatë natës.
Mbrojtja ajrore e vendit tha se kishte kapur 66 dronë ukrainas mbi rajonin Krasnodar që shtrihet në lindje të gadishullit të Detit të Zi të Krimesë.
Moska aneksoi ilegalisht gadishullin e Krimesë nga Ukraina në vitin 2014.//a.i/
