TIRANË, 9 maj /ATSH/- Maqedonia e Veriut dukej se ishte në një kurs konflikti me fqinjët e saj të BE-së, Greqinë dhe Bullgarinë, ndërsa opozita nacionaliste garonte në zgjedhjet parlamentare dhe presidenciale dje më 8 maj, sipas Euractiv.
Nacionalistët VMRO-DPMNE fituan fuqishëm, në një natë kur vendi ballkanik zgjodhi gjithashtu lideren e parë grua të shtetit.
“Njerëz të dashur të Maqedonisë së Veriut… ia dolëm. Kjo është një fitore historike e popullit”, tha lideri i VMRO-DPMNE-së, Hristijan Mickoski.
Rezultatet nga komisioni zgjedhor treguan se VMRO-DPMNE kishte marrë 42% të votave me 72% të votave të numëruara në sondazhin parlamentar, kundrejt 14% për socialdemokratët e qendrës së majtë në pushtet (SDSM), duke bërë që lideri i SDSM Dimitar Kovaçevski të pranonte humbjen.
“Rezultati është zhgënjyes dhe kjo është një goditje e madhe për SDSM”, tha Kovaçevski në një konferencë për shtyp në të cilën ai bëri thirrje gjithashtu për një riorganizim të plotë të partisë së tij.
Suksesi i partisë nacionaliste ka të ngjarë të ketë një efekt të madh në ëndrrën e vendit ballkanik për t’u bashkuar me Bashkimin Evropian.
Mickoski ka refuzuar të pranojë emrin e ri të vendit dhe një marrëveshje historike me Greqinë në vitin 2018, e cila shtoi “Veriun” në titullin e saj për të zgjidhur një mosmarrëveshje të gjatë dhe lejuar vendin të anëtarësohej në NATO.
Udhëheqësi i opozitës është zotuar gjithashtu të qëndrojë i palëkundur në një mosmarrëveshje me Bullgarinë mbi çështjet gjuhësore dhe historike që kanë bërë që Sofja të bllokojë bisedimet e pranimit të Maqedonisë së Veriut në BE për dy vitet e fundit.
Bullgaria ka kërkuar që Shkupi të ndryshojë kushtetutën e tij për të njohur pakicën e tij bullgare.
Në vitin 2022, Bullgaria ra dakord me një propozim të Presidencës së atëhershme franceze të Këshillit të BE-së për të hequr veton e saj për fillimin e negociatave të pranimit të Shkupit kur Maqedonia e Veriut të shtonte pakicën bullgare në kushtetutën e vendit.
LSDM-ja në pushtet ishte e përgatitur për të bërë ndryshimet, por nuk kishte një shumicë për të fituar votën parlamentare.
Votuesit në vendin ballkanik me 2 milionë banorë janë frustruar me progresin e ngadaltë të përpjekjeve të qeverisë për t’u anëtarësuar në Bashkimin Evropian, i cili u prit me optimizëm në vitin 2005, por që atëherë është bërë një emblemë e premtimit të humbur të Maqedonisë së Veriut.
Korrupsioni i qëndrueshëm dhe zhvillimi i ngadaltë i kanë acaruar votuesit kundër partisë në pushtet.
Në balotazhin për presidencën, Gordana Siljanovska-Davkova, një profesoreshë në Universitet e mbështetur nga VMRO-DPMNE, mundi me një shumicë dërrmuese presidentin aktual të mbështetur nga SDSM, Stevo Pendarovski.
Siljanovska-Davkova mori 65% të votave kundrejt 29% të Pendarovski, me më shumë se 87% të votave të numëruara.
Opozita ka të ngjarë të krijojë koalicione me partnerë më të vegjël për të fituar një shumicë në parlament. Diskutimet pritet të zhvillohen në ditët në vijim. //a.i/
