ANKARA, 20 tetor /ATSH-DPA/-Banka qendrore e Turqisë ka ulur sërish normën bazë të interesit në takimin e saj të tetorit, pavarësisht rritjes së inflacionit, dobësimit të lirës dhe rreziqeve të recesionit, duke sinjalizuar nje lëvizje të ngjashme në mbledhjen e ardhshme.
Komiteti i Politikës Monetare i Bankës Qendrore të Republikës së Turqisë (TCMB), i udhëhequr nga guvernatori Sahap Kavcioglu, uli normën e politikës, që është norma e ankandit të repo-ve njëjavore, nga 12% në 10,5%. Ekonomistët kishin planifikuar që norma të ulej në 11,0%.
Banka qendrore tha se do të vazhdonte të përdorte me vendosmëri të gjitha instrumentet e disponueshme derisa treguesit e fortë të shfaqnin një rënie të përhershme të inflacionit dhe objektivi afatmesëm prej 5% të arrihej në ndjekje të objektivit parësor të stabilitetit të çmimeve.
Inflacioni total arriti në nivelin më të lartë në 24 vjet në shtator.
“Rritja e fundit e inflacionit u nxit nga një kombinim i efekteve të vonuara dhe indirekte të rritjes së kostove të energjisë si rezultat i ngjarjeve gjeopolitike, si dhe goditjeve të forta negative të ofertës të shkaktuara nga rritja e çmimeve globale të energjisë, ushqimeve dhe produkteve bujqësore” theksoi banka.
“Banka qendrore turke pret që procesi i dezinflacionit të fillojë në bazë të masave të marra dhe të zbatuara me vendosmëri, për forcimin e qëndrueshmërisë së çmimeve dhe stabilitetit financiar së bashku me zgjidhjen e konfliktit të vazhdueshëm rajonal”, tha banka. //a.i/
