Ministri i Vetëqeverisjes Lokale në Maqedoninë e Veriut, Risto Penov, konsideron se kërkesa e Alternativës për “Asociacion të komunave shqiptare” në Maqedoninë e Veriut është tentim për të fituar pikë politike dhe apeloi që të kenë kujdes me deklarata të tilla, përcjell INA.
“Ne kemi ndërtuar një koncept të vetëqeverisjes lokale që i plotëson nevojat e të gjithë qytetarëve dhe të gjitha nacionaliteteve. E kuptoj momentin që tani dikush kërkon të marrë pikë politike, por duhet pasur kujdes me deklarata të tilla. Kërkesat e tilla mund të ndikojnë në marrëdhëniet ndëretnike, të cilat për fat të mirë sot janë shumë më stabile dhe supozoj se qytetarët nuk do të ndjekin kërkesat e tilla për dekompozim të shtetit”, tha Penov.
Ai gjithashtu informoi se ai vetë ka marrë pjesë në krijimin e vetëqeverisjes aktuale lokale, ndarjen territoriale dhe decentralizimin në vend.
“Pastaj gjatë negociatave me përfaqësuesit e BDI-së, në mesin e të cilëve ishin edhe përfaqësues nga grupi që tani po kërkon ndryshime, me mbështetjen e SHBA-së dhe BE-së dhe me pëlqim të ndërsjellë, ndërtuam konceptin e vetëqeverisjes lokale, që plotëson nevojat e të gjithë qytetarëve, të të gjitha nacionaliteteve, shtoi Penov. (INA)
