Në mars të vitit 2022, një burrë goditi gruan e tij me shufër. Ajo vdiq dhe ai tani është dënuar për vrasje
Gjyqi ndaj një 64-vjeçari nga Lindlari i Gjermanisë filloi më 22 dhjetor në Gjykatën e Qarkut të Këlnit. Burri që vrau gruan e tij u dënua të mërkurën. I akuzuari u dënua me shtatë vjet burg për vrasje. Gjykata e gjeti të provuar se burri vrau gruan e tij pas 43 vitesh martesë me të paktën pesë goditje me shufër. 63-vjeçarja vdiq pak më pas në spital nga një dëmtim i rëndë traumatik në tru.
Krimi ndodhi në mars të vitit 2022. Siç raporton Agjencia Gjermane e Shtypit, kryetari i trupit gjykues tha në fund të gjyqit se vrasja e gruas ishte “fundi tragjik i një marrëdhënieje”, transmeton portali Shtegu. Martesa e dy kosovarëve nga Lindlari u karakterizua nga një “bashkim i pavullnetshëm”, që në fillim pati mosmarrëveshje dhe konflikte mes çiftit. Burri dhe gruaja vinin nga Kosova dhe martesa e tyre atëbotë ishte aranzhuar.
I akuzuari u largua pas krimit me veturën e tij Porsche Cayenne, por pati një aksident duke ikur dhe e futi veturën në një pemë. 64-vjeçari ka pësuar lëndime të rënda dhe është dashur të trajtohet në një klinikë.
Sipas dpa, në vendimin e gjykatës thuhej se 64-vjeçari ka vepruar “me vullnetin absolut për të vrarë” kur ka goditur gruan e tij me shufër “me forcë të plotë dhe qëllimisht në kokë”. Megjithatë, për shkak të një shqetësimi të thellë të vetëdijes, ai ishte vetëm pjesërisht fajtor.
