TIRANE, 6 dhjetor /ATSH-DPA/ – Rusia dhe Kina po përpiqen të ushtrojnë ndikim në Ballkanin Perëndimor në sfondin e luftës në Ukrainë, deklaroi presidentja e Komisionit Evropian Ursula von der Leyen.
“A do të mbizotërojnë autokracitë dhe shteti i së drejtës? Apo do të mbizotërojë demokracia dhe shteti i së drejtës?” tha Von der Leyen në Tiranë me mbërritjen e saj në samitin e parë të liderëve të BE-së dhe Ballkanit Perëndimor që u mbajt në rajon.
“Kjo grindje është e dukshme edhe në Ballkanin Perëndimor: Rusia po përpiqet të ushtrojë ndikim, Kina po përpiqet të ushtrojë ndikim”, theksoi ajo.
”Shqipëria, Serbia, Bosnja dhe Hercegovina, Maqedonia e Veriut, Mali i Zi dhe Kosova janë pjesë e rajonit të Ballkanit Perëndimor. Vendimi për të mbështetur njërën palë përballet me secilën prej tyre”, theksoi von der Leyen.
“A jeni në anën e demokracisë – d.m.th. Bashkimin Evropian, miku dhe partneri juaj – apo dëshironi të merrni një rrugë tjetër?”, theksoi Von der Leyen duke shtuar se ”BE-ja është investitori më i madh në rajon”.
“Ne duhet të punojmë për liritë në botën e së nesërmes, duhet të luftojmë për vlerat tona”, tha presidenti i Këshillit Evropian Charles Michel pas takimit.
Në një deklaratë me shkrim të lëshuar pas takimit të martën, udhëheqësit e BE-së u kërkuan vendeve të Ballkanit Perëndimor që të rreshtohen plotësisht në çështjet e jashtme dhe të sigurisë, duke përfshirë sanksionet e BE-së ndaj Rusisë.
Pesë nga gjashtë vendet e Ballkanit Perëndimor mbështesin sanksionet e BE-së ndaj Rusisë për shkak të luftës së saj kundër Ukrainës, por Serbia ende nuk i ka miratuar masat ndëshkuese.
“Për çështjen e sanksioneve, ne kemi një mosmarrëveshje me Serbinë”, theksoi kancelari gjerman Olaf Scholz pas takimit.
Presidenti serb Aleksandar Vuçiç hodhi poshtë në mëngjes pretendimet se ”vendi i tij ishte shumë afër Rusisë”.
“Serbia është një vend i pavarur. Ne jemi në rrugën drejt BE-së dhe kështu do të mbetet”, tha Vuçiq. /os/
