BERLIN, 3 shkurt /ATSH-DPA/ – Ndërsa Gjermania përgatitet të presë Konferencën e Sigurisë së Mynihut këtë muaj, disa liderë ndërkombëtarë dhe parti politike gjermane do të përjashtohen nga takimi i këtij viti.
Njoftimi u bë i ditur nga kryetari i forumit të mbrojtjes.
Qeveritë e Rusisë dhe Iranit nuk janë ftuar në takim ku pritet të marrin pjesë rreth 50 liderë dhe rreth 100 ministra i planifikuar nga 16 deri më 18 shkurt.
Konferenca vjetore është një forum i pavarur për vendimmarrësit e politikave të sigurisë ku diskutohen sfidat aktuale dhe të ardhshme.
Të pranishmit zakonisht përfshijnë krerët e shteteve, qeverive dhe organizatave ndërkombëtare, ministra, ligjvënës dhe figura të larta të mbrojtjes.
“Para disa ditësh presidenti rus, Vladimir Putin tha se do të ishte i lumtur të negocionte, por jo me këtë qeveri ukrainase. Me fjalë të tjera, nuk ka vullnet serioz për të biseduar”, tha kryetari i konferencës Christoph Heusgen.
“Në rastin e Iranit, ne po dëgjojmë nga qeveria gjermane dhe gjithashtu nga amerikanët se nuk ka interes për bisedime”, tha ai.
Heusgen tha gjithashtu se disa parti politike gjermane nuk do të ishin në takim, duke përmendur partinë e ekstremit të djathtë Alternativa për Gjermaninë (AfD), e cila gjithashtu u përjashtua vitin e kaluar.
“Nga partitë e përfaqësuara në Bundestag, Aleanca e re populiste Sahra Wagenknecht (BSW) gjithashtu nuk është ftuar”, tha Heusgen.//a.i/
