KIEV, 20 janar /ATSH-DPA/ – Këshilltari presidencial ukrainas, Mykhailo Podoliak bëri thirrje për më shumë armë nga aleatët për të ndihmuar fushatën e mbrojtjes së vendit të tij kundër pushtimit rus duke pasur parasysh gjendjen aktuale të luftimeve.
“Problemi në këtë fazë të luftës është se numri i armëve, dronëve, granatave apo zjarrit të artilerisë nuk shpërndahet në mënyrë të barabartë. Kjo duhet të barazohet”, tha ai për gazetën gjermane ”Bild”.
”Vetëm një skenar është i mundur, forcimi maksimal i Ukrainës me armë të teknologjisë së lartë”, shtoi ai.
”Nuk është e nevojshme të flitet, por të investohet në prodhimin ushtarak. Numri i armëve duhet të jetë i madh”, theksoi Podoliak.
Podoliak, i cili këshillon presidentin ukrainas Volodymyr Zelensky, vuri në dukje frontin e gjatë, pasi vendi i tij kërkon të shmangë forcat ruse në disa drejtime, me sulme në disa drejtime.
”E gjithë vija e frontit është 1 300 kilometra dhe luftimet po zhvillohen mbi 600 deri në 800 kilometra”, tha Podoliak.
Ai e cilësoi situatën aktuale ushtarake si të vështirë për shkak se intensiteti i luftimeve nuk po zvogëlohet, pavarësisht nga faktorët klimatik.
”Rusia, megjithatë, nuk ka bërë ndonjë përparim të rëndësishëm në një vit. Rusia po lufton me masat, është kryer një mobilizim i fshehtë, është dërguar shumë fuqi punëtore në front, shumë pajisje janë përqendruar dhe të gjitha duhet të shkatërrohen”, tha ai.
Ai tha se supozonte se lufta do të vazhdonte sipas planeve të presidentit rus Vladimir Putin “derisa ai të pushtojë të gjithë territorin e Ukrainës, derisa të arrijë dominimin në Evropë, derisa të ketë pushtuar territore të tjera post sovjetike”./ a.jor.
