Shqipëria vijon të regjistrojë rezultate të shkëlqyera në arenën ndërkombëtare me sportin e mundjes, teksa suksesi më i fundit ka ardhur nga Kampionati Europian që po mbahet në Bukuresht.
Islam Dudaev ka bërë një paraqitje të jashtëzakonshme mbrëmjen e djeshme, duke koleksionuar katër fitore të njëpasnjëshme, për t’u kualifikuar në finalen e peshave 65 kg në të mundjes stil i lirë, në europianin që po zhvillohet në Rumani. Mundësi rus, me pasaportë shqiptare, u tregua fantastik në të gjitha duelet e tij.
Dudaev e vijoi serinë e ndeshjeve të shkëlqyere edhe në katërshe, teksa kaloi me sukses me rezultatin 3-1 azerin Ali Rahimzada, duke prerë biletën që të çon në finalen e madhe, aty ku sot rreth orës 17:30 do të matë forcat me rusin Gadzhimurad Rashidov.
Dudaev tashmë e ka të sigurt medaljen e argjendit, por kampioni kuqezi do të japë gjithçka për të bërë të tijën të artën. Kujtojmë që edhe dy vite më parë në Europianin e zhvilluar në Budapest, Islam Dudaev i ka dhuruar Shqipërisë medalje bronzi.
Top Channel
