Klubi i Komos mund t’i besojë përkohësisht skuadrën një emri të njohur për Kombëtaren shqiptare të futbollit. Marko Kaseti, ndihmësi i Kristian Panuçit në vitet kur ai drejtonte Shqipërinë, pritet të jetë në pankinë në ndeshjen e kësaj fundjave që klubi i Serisë B do të luajë kundër Specias.
Në fakt, skuadra e cila ka si drejtoj spanjollin Çesk Fabregas, ka caktuar uellsianin Osian Roberts për t’u ulur në pankinë. Por procedurat burokratike për lejen e punës nga britaniku do të zgjatë shumë dhe ai nuk është i gatshëm për t’u ulur në stol në ndeshjen e kësaj jave. Fabregas kishte marrë një licencë të përkohshme për të drejtuar ekipin derisa të zgjidhej trajneri i ri, por kjo leje ka mbaruar.
Kështu, mediat italiane kanë zbuluar se pritet që në këtë ndeshje të jetë pikërisht Kaseti, pjesëtar i stafit të kësaj skuadre, ai që do të drejtojë ekipin. Vetëm pas një jave dyshja Roberts-Fabregas do të kthehet përsëri në pankinë, por duke mbajtur Kasetin pjesë të stafit teknik.
PANORAMASPORT.AL