Trajneri legjendarë, Fabio Kapelo ka dhënë një intervistë për italianen “La Gazzetta Dello Sport”, ku është pyetur në lidhje me situatën e Juventusit për momentin, duke qenë edhe një ish-trajner i “Zonjës së vjetër”.
“Mungesa e Vlahoviç kundër Lacios do të jetë e rëndë, përveç asaj të Milik. Maks (Masimiliano Alegri) si qendërsulmues në “Olimpiko” do të ketë vetëm Ken, i cili nuk ka luajtur një ndeshje të plotë për muaj e muaj. Por është mënyra se si Vlahoviç u përjashtua kundër Xhenoas që më bën të pyes veten, pse gjithë ai nervozizëm?
Nuk po shoh një Kieza të keq. Ai është shumë aktiv, punon shumë, ndoshta është pak i nxituar në zgjedhjet e tij, por pikërisht sepse dëshiron të lërë gjurmë. E di që është kritikuar, por unë nuk jam dakord.”
Juventus do të ndeshet me Lacion në “Olimpiko”, me datën 30 mars, dhe ashtu siç tha edhe Kapelo, bardhezinjtë nuk do të kenë të disponueshëm asnjë nga sulmuesit e tyre kryesorë, përveç Moise Ken. Një tjetër sfidë tepër e vështirë për të besuarit e Masimiliano Alegrit.
PANORAMASPORT.AL
