Partizani është transferuar në Turqi, për të zhvilluar një mini-fazë përgatitore në Antalia.
Kjo është një periudhë njohje nga afër midis ekipit dhe stafit të ri teknik, me në krye ish-portierin dhe kapitenin e “demave të kuq”, Orges Shehi. Dje të kuqtë kanë kryer seancën e parë, ndërsa sot programi do të vijojë me sy seanca.
Gjatë këtyre ditëve në Turqi, përveç përgatitjeve me intensitet, skuadra pritet të zhvillojë edhe dy ndeshje miqësore, pikërisht ndaj holandezëve të Volendamit dhe azerëve të Neftçi.
Mediat holandeze dhe azere, por edhe vete klubi i kuq kanë zbuluar edhe axhendën e këtyre dy testeve të “demave të kuq”.
Testi me klubin e elitës holandeze është parashikuar që të zhvillohet ditën e premte, më 5 janar. Padyshim këtu merr udhë edhe Partizani i trajnerit Orges Shehi.
Ndërsa më 9 janar do të luhet miqësorja e dytë me Neftçin dhe më pas Partizani pritet që të kthehet në kryeqytet për t’u bërë gati për startin e fazës së tretë, ku përballë do të kenë Teutën.
