Sulmuesi Karim Benzema, ka ngritur një padi për shpifje kundër ministrit të Brendshëm të Francës, pasi e akuzon atë për lidhje me Vëllazërinë Myslimane.
Në ankesën e tij prej 92 faqesh, të raportuar gjerësisht në mediat franceze, Benzema thotë se “kurrë nuk ka pasur as lidhjen më të vogël me organizatën Vëllazëria Myslimane, as me njohuritë (e tij) me këdo që pretendon se është anëtar i saj”.
“Unë jam i vetëdijshëm që për shkak të famës sime, jam duke u përdorur në lojëra politike, të cilat janë edhe më skandaloze duke qenë se ngjarjet dramatike që nga 7 tetori meritojnë diçka krejtësisht të ndryshme nga kjo lloj deklarate”, u shpreh ish-ylli i Realit.
Rikujtojmë që në tetor, ministri Gerald Darmanin u shpreh se francezi “ka një lidhje famëkeqe” me grupin islamik mysliman sunit. “Ne po luftojmë hidrën që është Vëllazëria Myslimane, sepse ajo krijon një atmosferë xhihadizmi”, tha politikani për kanalin televiziv konservator CNews.
Vëllazëria Myslimane u themelua rreth 80 vjet më parë në Egjipt. Kryesisht një lëvizje ideologjike pa strukturë formale, dhe ndërsa është e ndaluar në shumë vende, ajo nuk është e kufizuar në pjesën më të madhe të Bashkimit Evropian. Ndikimi i grupit në Evropë shihet kryesisht nëpërmjet organizatave të para të cilat bëjnë fushatë për kauza islame, si e drejta e grave për të veshur mbulesë koke.
PANORAMASPORT.AL
