BRUKSEL, 14 prill /ATSH-DPA/- Presidentja e Komisionit Evropian, Ursula von der Leyen ka dënuar sulmin e paprecedentë të Iranit ndaj Izraelit duke u bërë thirrje të gjitha palëve të tregojnë maturi.
“Unë dënoj fuqishëm sulmin flagrant dhe të pajustifikueshëm të Iranit ndaj Izraelit. Dhe i bëj thirrje Iranit dhe përfaqësuesve të tij që t’i ndërpresin menjëherë këto sulme”, shkroi von der Leyen në X, dikur Twitter.
“Të gjithë aktorët tani duhet të vetëpërmbahen nga përshkallëzimi i mëtejshëm dhe të punojnë për të rivendosur stabilitetin në rajon”, shtoi ajo.
Për herë të parë në historinë e Republikës Islamike, Irani sulmoi drejtpërdrejt armikun e tij, Izraelin.
Sipas ushtrisë izraelite, më shumë se 300 dronë dhe raketa u qëlluan në sulmin në shkallë të gjerë. Sipas ushtrisë, shumica prej tyre u kapën ndërsa ishin ende jashtë kufijve të Izraelit.
Vetëm një numër i vogël raketash goditën territorin izraelit dhe nuk pati viktima apo dëme të mëdha.//a.i/
