LONDËR, 15 shkurt /ATSH-AFP/ – Mbretëria e Bashkuar njoftoi sot, gjatë një takimi të NATO-s, se do të bashkëdrejtojë me Letoninë një koalicion vendesh përgjegjëse për organizimin e dorëzimit të mijëra dronëve në Ukrainë përballë pushtimit rus.
Gjatë një vizite në Kiev në janar, kryeministri britanik Rishi Sunak njoftoi një rritje të ndihmës britanike duke përfshirë 200 milionë paund (230 milionë euro) për të ofruar mijëra dronë ushtarakë për ushtrinë ukrainase.
”Kjo do të rezultojë veçanërisht në koalicionin që Londra do të udhëheqë me Rigën”, njoftoi ministri i Mbrojtjes, Grant Shapps përpara takimit të sotëm me homologët e tij të NATO-s në Bruksel.
”Në këtë kontekst, Mbretëria e Bashkuar do të organizojë prodhimin, përfshirë nga prodhuesit britanikë, të dronëve “në një shkallë të gjerë dhe me çmime të përballueshme”, tha ministria.
”Objektivi është në veçanti prodhimi i dronëve FPV , të cilët janë dëshmuar shumë efektivë në terren që nga pushtimi në shkallë të gjerë i nisur nga Rusia”, specifikon Londra.
Të pajisur me kufje të realitetit virtual, pilotët e tyre mund të shohin imazhet e terrenit drejtpërdrejt sikur të ishin drejtpërdrejt në bord.
“Ne do t’i japim Ukrainës aftësitë që i nevojiten për të mbrojtur veten dhe për të fituar këtë luftë, për të siguruar që Putini të dështojë në ambiciet e tij të paligjshme dhe barbare”, citohet të ketë thënë Shapps në deklaratë.
Këto iniciativa shpallen ndërkohë që ndihma amerikane për Kievin është bllokuar në Kongres./ a.jor.
