BERLIN, 20 mars /ATSH-DPA/- Kancelari gjerman, Olaf Scholz u përpoq të portretizonte unitetin midis aleatëve evropianë të Ukrainës gjatë një fjalimi sot në parlament në Berlin, përpara samitit të Bashkimit Evropian në Bruksel, i cili fillon të enjten.
“Ne qëndrojmë së bashku”, tha Scholz, duke theksuar tre parime të përbashkëta të shprehura gjatë një takimi javën e kaluar midis Scholz, presidentit francez, Emmanuel Macron dhe kryeministrit polak, Donald Tusk.
“Ne do të mbështesim Ukrainën për aq kohë sa të jetë e nevojshme”, tha Scholz, duke shtuar se ai do të sigurojë gjithashtu që aleanca e NATO-s të mos përfshihet drejtpërdrejt në luftime.
“Dhe ne nuk do të pranojmë një paqe të diktuar në kurriz të Ukrainës”, tha Scholz.
Takimi i Scholz me Tusk dhe Macron erdhi mes mosmarrëveshjeve publike dhe tensioneve midis Gjermanisë dhe aleatëve të saj për mbështetjen për Ukrainën.
Scholz tërhoqi kritika ndërkombëtare për refuzimin e tij për të dërguar raketa me rreze të gjatë “Taurus” në Ukrainë, për të cilat ai tha se do të rrezikonin përshkallëzimin e konfliktit.//a.i/
