BERLIN, 29 shkurt /ATSH-DPA/ – Ministrja e Jashtme gjermane Annalena Baerbock beson se zhvillimet e fundit në Moldavi pasqyrojnë ato që ndodhën në fillimin e konfliktit Ukrainë-Rusi disa vite më parë, kur Moska aneksoi ilegalisht gadishullin e Krimesë.
Komentet e saj erdhën pasi sundimtarët pro-rusë të rajonit separatist të Transnistria të Moldavisë i bënë thirrje Rusisë për “mbrojtje”.
Kongresi i rajonit të shkëputur ndërkombëtarisht të panjohur, i cili kufizohet me Ukrainën, votoi në favor të një rezolute të tillë të mërkurën, njoftuan mediat moldave.
Sipas rezolutës, Transnistria dëshiron t’i drejtohet Këshillit të Federatës Ruse dhe Dumës së Shtetit “me një kërkesë për të zbatuar masa për të mbrojtur Transnistrinë përballë presionit në rritje nga Moldavia”.
Çfarë saktësisht presin ata nga Rusia nuk ishte menjëherë e qartë.
Kryediplomatja gjermane Baerbock tërhoqi paralele me zhvillimet në Ukrainën lindore disa vite më parë, kur pakicat u shfrytëzuan nga presidenti rus Vladimir Putin për ta ndihmuar atë të përgatiste pushtimin e tij në shkallë të plotë të Ukrainës në vitin 2022. /os/
