Nëse nuk jeni atlet apo njeri që stërviteni rregullisht, e megjithatë doni të bëni diçka për shëndetin tuaj, atëherë është koha të përzgjidhni ushtrimet që janë më të mira për ju.
Më poshtë janë 5 lloje ushtrimesh, që pavarësisht moshës apo elasticitetit fizik, do t’ju mbajnë në formë dhe do të ulin rrezikun për sëmundje.
1. Noti. Mund të quhet vërtet si ushtrim shumë i mirë. Uji mbështet trupin tuaj dhe nuk i sforcon kyçet kështu që mund t’i lëvizni më lirshëm. “Noti është shumë i mirë për personat me artrit pasi s’kanë nevojë të mbajnë peshën e tyre”, thotë dr. I-Min Lee, profesor i mjekësisë në Shkollën Mjekësore të Harvardit. Studimet tregojnë se noti përmirëson gjendjen mendore dhe ju bën më pozitivë. Gjithashtu ju ndihmon të digjni kaloritë e të tonifikoheni.
2. Tai çia (tai chi, tai ji). Është një art marcial kinez (kung fu) i cili përmbledh lëvizjen dhe qetësinë dhe është shumë i mirë për mendjen dhe trupin. Në fakt, është quajtur edhe “meditimi në lëvizje”. Tai çia është e përbërë nga një grup lëvizjesh të hijshme. Duke qenë se kurset ofrohen për nivele të ndryshme, tai çia është e vlefshme për të gjitha moshat dhe nivelet.
“Është veçanërisht e mirë për njerëzit e moshuar sepse u siguron atyre një ekuilibër të mirë dhe ekuilibri është një nga problemet më të mëdha ndërsa vitet kalojnë”, thotë dr. Lee.
3. Stërvitje force. Nëse besoni se stërvitjet e forcës janë vetëm për ata që duan të hiqen si të fortë, është mirë ta rimendoni. Ngritja e peshave nuk dot ‘ju krijojë muskuj, por do t’i mbajë ata të fortë. “Nëse nuk i përdorni muskujt, atëherë ata do ta humbin forcën me kalimin e kohës”, thotë dr. Lee. Muskujt gjithashtu ndihmojnë në djegien e kalorive. “Sa më shumë muskuj të keni, aq më shumë kalori digjni dhe aq më të lehtë e keni për të mbajtur peshën tuaj”, shpjegon mjeku.
Por para se të filloni një program stërvitje force, sigurohuni që po bëni gjëni e duhur. Fillojeni me pesha të lehta. Pas disa javësh rriteni peshën ose shtoni herët që ngrini peshën.
4. Ecja. Ecja është e thjeshtë, e megjithatë shumë e fuqishme. Ajo ju ndihmon të ruani peshën, përmirëson nivelet e kolesterolit, forcon kockat, mban tensionin e gjakut nën kontroll, ju përmirëson humorin, ul rrezikun për një numër sëmundjesh (si diabeti dhe sëmundjet e zemrës). Shumë studime kanë treguar se ecja dhe aktivitete të tjera mund të përmirësojnë edhe kujtesën, sidomos tek moshat e mëdha. Gjithçka që ju duhet është një palë atlete të mira. Filloni të ecni 10-15 minuta. Më pas ndoshta mund të ecni më shpejt dhe më gjatë deri sa të arrini në 30-60 minuta disa herë në javë.
5. Ushtrimet Kegel. Këto ushtrime nuk ju bëjnë të dukeni më mirë, por bëjnë diçka të rëndësishme: forcojnë muskujt e zonës pelvike që mbështet fshikëzën e urinës. Muskujt e fortë të zonës pelvike ndihmojnë në parandalimin e problemeve me mosmbajtjen e urinës. Ndërsa shumë gra janë familjare me ushtrimet Kegel, ato janë të mira për meshkujt.
Për t’i bërë siç duhet ushtrimet Kegel, shtrëngoni dhe lironi muskujt që përdorni për të ndaluar urinën ose daljen e gazrave. Shtrëngoni muskujt për 10 sekonda dhe pastja lirojini për 10 sekonda të tjera. Mund të bëni 3 sete me ushtrime Kegel çdo ditë.
