Dhjetëra njerëz janë vrarë sot nga sulmet izraelite të cilat goditën ndërtesat e banimit në qytetin jugor të Gazës, Rafah.
Agjencia e lajmeve Wafa tha se mes të vrarëve ishte një gazetar palestinez i quajtur Adel Zourub si dhe anëtarë të familjes së tij. Nuk dihet ende se për cilën media ka punuar Zourub.
Të paktën 64 gazetarë dhe punonjës të medias janë vrarë që nga fillimi i luftës midis Izraelit dhe Hamasit më 7 tetor, tha të dielën në një deklaratë Komiteti për Mbrojtjen e Gazetarëve. Shumica dërrmuese e tyre janë palestinezë.
Gjithashtu bombardimet në qytetet qendrore dhe jugore të Gazës si Bureij dhe Khan Younis kanë vazhduar gjatë natës. Këshilli i Sigurimit i OKB-së pritet të votojë për një rezolutë të re të armëpushimit në Gaza më vonë sot në mes të presionit ndërkombëtar në rritje, për të zvogëluar numrin e viktimave civile.
Oferta e re e Këshillit për një pauzë në luftime vjen 10 ditë pas një përpjekjeje të mëparshme e cila u bllokua nga një prej aleatëve më të mëdhenj të Izraelit – SHBA.
Ndërkohë SHBA thotë se dhjetë vende kanë rënë dakord të formojnë një koalicion për të mbrojtur anijet tregtare në Detin e Kuq. Grupi Houthi i mbështetur nga Irani në Jemen ka intensifikuar sulmet ndaj dërgesave në Detin e Kuq, një korridor i madh për tregtinë ndërkombëtare. Grupet thonë se sulmet janë një reagim ndaj sulmeve izraelite në Gaza.
Departamenti i Mbrojtjes i SHBA tha në një deklaratë se Mbretëria e Bashkuar, Kanadaja, Bahreini, Franca, Norvegjia, Spanja dhe Seychelles janë ndër dhjetë kombet që do të operojnë nën flamurin e Operacionit Prosperity Guardian, në mënyrë që të sigurojnë që të gjitha anijet tregtare të lundrojnë lirshëm. Vendimi vjen pasi gjiganti i naftës BP njoftoi se do të ndalonte të gjitha dërgesat përmes Detit të Kuq.
Top Channel
