Kryetarja e qytetit të Shkupit Danella Arsovska njoftoi se shërbimet e qytetit të Shkupit zbuluan një katastrofë ekologjike në një parcelë prej 4000 metra katrorë pronë private dhe 5000 metra katrorë pronë shtetërore afër lumit Lepenc, vetëm disa qindra metra larg nga një objekt fetar që po ndërtohet nga komuna Gjorçe Petrov e financuar nga BE. Arsovska tha se deponia e egër private ndodhet në një parcelë në pronësi të një kompanie që është nën hetim për krime të tjera si dhe nga një person i punësuar në Komunën Gjorçe Petrov në departamentin e financave, i zgjedhur edhe anëtar i kryesisë i sindikatës së të punësuarve të Komunës. Siç bëri të ditur Arsovska, përgjegjësit janë kapur në vend-ngjarje teksa po kryenin ekocid, janë penguar të kryejnë veprimtari të kundërligjshme, janë mbledhur provat dhe është fotografuar edhe gjendja.
DANELLA ARSOVSKA, KRYETARE E QYTETIT TË SHKUPIT
“Nuk do të lejojmë askënd që të helmojë qytetarët e Shkupit me vetëdije dhe për përfitim. Është konstatuar se deponia e egër private është shfrytëzuar si biznes nga personat e përmendur, të cilët jo vetëm kanë shkaktuar katastrofë екологјике duke hedhur mbeturina në zonën mbrojtëse të lumit Lepenc, por dyshohen edhe për krime financiare. Pyetja është nëse klienti më i madh i këtyre personave që bënë ekocid është Komuna Gjorçe Petrov”
Ajo ka shpjeguar se në dokumentacionin në të cilin janë mbajtur evidenca kundërligjore, mund të shihet qartë se përveç kompanive ndërtimore dhe individëve privatë nga të cilët është paguar nga 1.000 deri në 1.200 denarë, klienti më i zakonshëm që ka depozituar mbeturina të rrezikshme ka qenë Komuna.
Komuna, siç shtoi Arsovska, nuk kishte lidhur marrëveshje me NP “Drislla” për deponimin e mbeturinave komunale. Ajo bën apel që rasti të procedohet sa më shpejtë, ndërsa ka paralajmëruar kallëzim të veçantë penal kundër kryetarit të komunës Gjorçe Petrov, Aleksandar Stojkovski.
Medina Ajeti Ali /SHENJA/
MARKETING
