Bëhet e ditur se 121 fëmijë kanë humbur jetën dhe 167 të tjerë janë plagosur nga sulmet e ushtrisë ruse në Ukrainë.
Në deklaratën e Prokurorisë së Përgjithshme të Ukrainës, theksohet se nga bombardimet e ushtrisë ruse janë dëmtuar 548 institucione arsimore, 72 prej të cilave janë shkatërruar plotësisht.
Në deklaratë thuhet se 121 fëmijë kanë vdekur dhe 167 të tjerë janë plagosur, sipas përcaktimeve të para, që nga 24 shkurti, kur Rusia filloi sulmet e saj në Ukrainë.
- Zëvendëskryeministrja ukrainase, Irina Vereshçuk njoftoi se më shumë se 7.000 banorë të Mariupolit u evakuuan gjatë ditës.
Vereshçuk dha informacione rreth procesit të evakuimit të civilëve nga vendet ku ndodhën konfliktet në Ukrainë, në videon që publikoi në rrjetet sociale.
Duke deklaruar se po drejtojnë korridoret e ndihmës humanitare për evakuimin e banorëve të Mariupolit, Vereshçuk tha: “Një mijë e 100 banorë të Mariupolit u evakuuan nga qyteti Berdyansk. Përveç kësaj, 5 mijë e 926 njerëz arritën në qytetin Zaporizhia përmes korridoreve të ndihmës humanitare nga qyteti i Mariupolit me automjete personale”.
Ajo tha se evakuimet në disa fshatra të Mariupolit u penguan nga forcat ushtarake ruse dhe shtoi se ata dërguan furnizime mjekësore dhe ushqimore në Berdyansk dhe se do të vazhdojnë evakuimet atje nesër.
Zyrtarët ukrainas pretenduan se trupat ruse që pushtuan termocentralin bërthamor të Çernobilit “plaçkitën dhe shkatërruan” një laborator në zonë.
- Agjencia Shtetërore e Menaxhimit të Zonës së Evakuimit tha se rusët dëmtuan rëndë Laboratorët Qendrorë Analitikë që përpunojnë mbetjet radioaktive.
“Sot në laborator e marrë nën kontrollin e armikut kishte mostra (kampione) shumë aktive dhe shembuj radionuklidësh”, thuhej në deklaratën e agjencisë shtetërore ukrainase.
Zëdhënësi i Ministrisë së Punëve të Jashtme, Oleg Nikolenko, deklaroi se qyteti i Hersonit, i rrethuar nga ushtria ruse, po përballet me një fatkeqësi humanitare.
Duke vënë në dukje se forcat ushtarake ruse po rrethojnë Hersonin, Nikolenko tha në rrjetet sociale se: “300 mijë banorë të Hersonit po përballen me një fatkeqësi humanitare për shkak të bllokadës së ushtrisë ruse. Rezervat e ushqimit dhe ilaçeve në Herson janë pothuajse të konsumuara. Megjithëkëtë, Rusia refuzon të hapë korridoret humanitare për evakuimin e civilëve”.
Ai i cilësoi veprimet e Rusisë si “barbare” dhe theksoi se kjo duhet të ndalet.
- Andriy Yermak, Shefi i Zyrës së Presidencës, deklaroi se Kina duhet të luajë një rol “të rëndësishëm” në ndalimin e luftës së nisur nga Rusia kundër vendit të saj.
Yermak në llogarinë e tij në Twitter, shkroi: “Kiev shpreson se Pekini do të luajë një rol më të spikatur në ndalimin e luftës.”
Ai theksoi gjithashtu se janë në pritje të një takimi mes presidentit rus Vladimir Zelenskiy dhe presidentit kinez, Xi Jinping.
Ministri i Punëve të Jashtme, Dmitro Kuleba, në deklaratën e tij më 21 mars, i tha Kinës se situata në Ukrainë duhet të përfshihet në procesin e zgjidhjes.
Në të njëjtën ditë, zëdhënësi i Ministrisë së Jashtme kineze, Wang Wenbin deklaroi se Rusia dhe Ukraina duhet të vazhdojnë dialogun mes tyre dhe se duhet të vendoset paqja në negociata.
- Moska: Kemi shkatërruar arsenalin ushtarak të Ukrainës në disa vendndodhje të vendit
Ministria ruse e Mbrojtjes njoftoi se në 5 vendndodhje në Ukrainë arsenalet e ushtrisë u goditën me armë të precizionit të lartë me rreze të gjatë veprimi.
Zëdhënësi i Ministrisë së Mbrojtjes së Rusisë, Igor Konashenkov bëri deklarata për aktivitet e ushtrisë ruse në luftën në Ukrainë.
Konashenkov deklaroi gjatë ditës së martë objektet ushtarake ukrainase u goditën me armë me precizion të lartë me rreze të gjatë veprimi nga ajri dhe deti. “Depo të mëdha karburanti dhe nafte të trupave ukrainase u shkatërruan në vendndodhjet në Lisichansk dhe Kramatorsk, municione raketash dhe artileri u shkatërruan në Drujkovka, dhe në Nadejdinka dhe Novoaleksandrovka u shkatërruan depot me municione”, tha ai.
Duke vënë në dukje se forcat ajrore ruse shkatërruan 83 objekte ushtarake që i përkisnin ushtrisë ukrainase, Konashenkov tha se këto përfshijnë 4 qendra komanduese, 4 sisteme raketore të mbrojtjes ajrore, 3 municione, si dhe 68 automjete teknike ushtarake. “Deri më sot janë shkatërruar 236 mjete ajrore pa pilot, 154 raketahedhës me shumë tyta, 185 sisteme raketash të mbrojtjes ajrore, 1.547 tanke dhe automjete të blinduara, 612 aviatorë dhe mortaja, 1.343 mjete ushtarake speciale të ushtrisë ukrainase”, tha Konashenkov.
- Zelenskiy: Negociatat e përditshme me Rusinë, “të vështira” dhe “të diskutueshme”
Presidenti i Ukrainës, Vladimir Zelenskiy deklaroi se negociatat me Rusinë vazhdojnë në një mënyrë “të vështirë” dhe “të diskutueshme”.
Në videon që publikoi në kanalin e tij Telegram, Zelenskiy bëri deklarata për negociatat me Rusinë dhe evakuimin e civilëve nga zonat e konfliktit në vendin e tij.
Ai iu referuar procesit të negociatave midis Ukrainës dhe Rusisë duke thënë: “Ne vazhdojmë të punojmë në nivele të ndryshme për të detyruar Rusinë të bëjë paqe dhe t’i japë fund kësaj lufte brutale”.
Lideri ukrainas bëri të ditur se negociatat mbahen çdo ditë dhe shtoi: “Negociatat janë shumë të vështira dhe ndonjëherë të diskutueshme, por ne po përparojmë hap pas hapi.”
Duke vënë në dukje se samitet e NATO-s, G7 dhe Bashkimit Evropian (BE) do të mbahen këtë javë, Zelenskiy deklaroi se mund të zbatohen paketat e reja të sanksioneve kundër Rusisë.
Ai tha se ushtria ruse po sulmon vazhdimisht qytetin e Mariupolit, dhe në qytetin në fjalë ndodhen rreth 100 mijë njerëz.
Duke thënë se po përpiqen të evakuojnë civilët që janë aty nga korridoret e ndihmës humanitare, Zelenskiy tha se kjo është parandaluar nga forcat ruse.
Ai vuri në dukje se kolona e ndihmave humanitare dhe punonjësit e Shërbimit të Emergjencave të Ukrainës janë kapur nga ushtarët rusë dhe shtoi: “Ne po bëjmë çmos për të çliruar njerëzit tanë dhe për të bërë të funksionojnë korridoret humanitare”.
Duke thënë se rreth 7 mijë banorë të Mariupolit janë evakuuar gjatë ditës, Zelenskiy theksoi se ata do të vazhdojnë të evakuohen edhe në ditët në vijim.
