ROMË, 22 korrik /ATSH-ANSA/ – Çmimi i grurit i rikthehet niveleve të para sulmit rus në Ukrainë, më 24 shkurt, në ditën e marrëveshjes mes Moskës dhe Kievit që synon zhbllokimin e eksporteve përmes porteve në Detin e Zi.
Marrëveshja e Stambollit duhet të jetë marrëveshja e parë reale për korridoret në Detin e Zi për eksportin e grurit nga portet ukrainase.
Dhe mbi të gjitha marrëveshja e parë mes Moskës dhe Kievit që nga fillimi i luftës.
Nuk është rastësi që i pranishëm do të jetë edhe sekretari i përgjithshëm i OKB-së, Antonio Guterres.
Lajmin e dha zyra e presidentit turk Recep Tayyip Erdogan, ndërmjetësi i madh i marrëveshjes, e cila do të nënshkruhet nga delegacionet ruse dhe ukrainase në pallatin luksoz ”Dolmabahçe”, në ngushticën e Bosforit.
Marrëveshja u la të nënkuptohej që në takimin e disa ditëve më parë në Teheran mes Erdoganit dhe presidentit rus Vladimir Putin, i cili foli për një progres në eksportin e grurit ukrainas, të cilin ai e kishte cilësuar një shenjë e mirë.
Megjithatë, vetë Putini kishte theksuar se çdo marrëveshje duhet të përfshinte edhe eksportet e bllokuara të grurit rus.
Ministri i Jashtëm turk, Mevlut Cavusoglu nga ana e tij deklaroi se, kur ky problem të zgjidhej, do të hapej jo vetëm rruga e eksportit të grurit dhe vajit të lulediellit nga Ukraina, por edhe e produkteve nga Rusia.
Ministri rus i Mbrojtjes Shoigu mbërriti në Stamboll për të nënshkruar marrëveshjen e grurit të arritur midis Rusisë, Ukrainës dhe OKB-së me ndërmjetësimin e Turqisë.
Së bashku me Shoigu është homologu i tij turk Hulusi Akar dhe ministri ukrainas i Infrastrukturës Aleksandër Kubrakov, sipas televizionit turk, TRT./ /a.i/
