Lamtumirë Tina Turner. Këngëtarja u nda nga jeta në moshën 83-vjeçare pas një beteje të gjatë me një sëmundje. Ajo kishte kohë që e kishte braktisur skenën, por kishte marrë një vendim të rëndësishëm për të ardhmen e saj private dhe profesionale.
Disa vite më parë ylli kishte shitur të gjithë katalogun e saj muzikor. Të drejtat për këngët e saj iu shitën kompanisë diskografike BMG, në atë që është përshkruar si një nga marrëveshjet më të mëdha të bëra ndonjëherë nga një artist i vetëm në industrinë e muzikës.
Shuma e marrëveshjes nuk është bërë e ditur asnjëherë, por sipas ekspertëve të BBC News flitet për një vlerë prej mbi 50 milionë dollarësh.
Tina Turner kishte grumbulluar një pasuri të konsiderueshme gjatë karrierës së saj. Me një vlerë neto të vlerësuar në 250 milionë dollarë, ajo ishte ndër këngëtaret më të luajtura dhe më të shitura të të gjitha kohërave, me mbi 200 milionë disqe të shitura në mbarë botën.
Kush e zotëron trashëgiminë e Tina Turner? Duket se luanesha e rock’n roll-it ia ka lënë gjithçka në testament bashkëshortit të saj Erwin Bach, producent muzikor me të cilin u martua në vitin 2013, tre fëmijëve dhe pjesës tjetër të familjes.
