Legjenda e Chelseat, John Terry, ka përmendur Cole Palmer, Raheem Sterling dhe Thiago Silva si tre lojtarë nga skuadra aktuale që i kanë bërë më shumë përshtypje.
Blutë kanë pasur vështirësi që nga fillimi i sezonit të kaluar nën pronësinë e re të drejtuar nga Todd Boehly. Ata kanë shpenzuar mbi 1 miliard £ për lojtarë të rinj në atë kohë, por përfunduan në vendin e 12-të në Premier League sezonin e kaluar dhe janë të 10-të këtë sezon pas 12 ndeshjesh.
Megjithatë, paraqitjet e Chelseat kanë qenë të mira këtë sezon dhe disa lojtarë kanë spikatur më shumë se të tjerët. Legjendës së klubit londinez, Terry, së fundmi iu kërkua të përmendte lojtarët që i kanë bërë përshtypje deri më tani dhe ai tha për Football.London:
“Para së gjithash, Cole Palmer padyshim. Mendoj se ajo që më pëlqen te Cole është se që në penalltinë e parë që ai goditi, ai nuk pati dyshime dhe e mori menjëherë topin. Që një lojtar i ri ta bëjë këtë në një klub të futbolli si i yni, tregon personalitet të madh. Ai ka qenë fenomenal.
“Unë mendoj se Raheem Sterling është i mrekullueshëm dhe unë kam luajtur kundër tij më parë dhe ai është një makth absolut. Ai ka qenë vërtet emocionues, por për mua, më pëlqen të shikoj Thiago Silva”.
Palmer u transferua te Chelsea nga Manchester City për 45 milionë sterlina në verë dhe ka kontribuar me katër gola dhe katër asiste në 11 ndeshje në të gjitha kompeticionet.
Sterling, ndërkohë, erdhi nga City sezonin e kaluar. Pas një sezoni të dobët, ai ka shënuar pesë gola dhe ka dhënë dy asiste në 14 ndeshje këtë sezon.
Silva ka qenë një figurë konstante për skuadrën londineze nën drejtimin e Mauricio Pochettino, duke luajtur çdo minutë në Premier League këtë sezon.
