TEL AVIV, 19 tetor /ATSH-DPA/ – Kryeministri britanik Rishi Sunak do të mbërrijë në Izrael ndërsa përgatitet të takohet me liderët e Lindjes së Mesme dhe do të bëjë thirrje që të shmanget çdo rritje e dhunës.
Sunak do të takohet me kryeministrin e vendit, Benjamin Netanyahu dhe presidentin izraelit Isaac Herzog ndërsa ai fillon një udhëtim dy-ditor që pritet të vizitojë disa kryeqytete rajonale.
Ai do t’u bëjë thirrje udhëheqësve të Lindjes së Mesme që të “shmangin përshkallëzimin e mëtejshëm të rrezikshëm”, duke thënë se “shumë jetë janë humbur tashmë” në luftën midis Izraelit dhe Hamasit.
Vizita e tij vjen pasi presidenti amerikan fluturoi në Izrael të mërkurën në një përpjekje diplomatike për të parandaluar që luftimet të përshkallëzohen në një krizë më të gjerë.
Joe Biden i kërkoi Izraelit që të mos e lërë veten të “të konsumohet” nga zemërimi pas sulmit vdekjeprurës të Hamasit më 7 tetor dhe të shmangë të njëjtat “gabime” të bëra nga Shtetet e Bashkuara pas 11 shtatorit 2001, pas sulmeve islamike që vranë afro 3 000 persona.
Udhëtimi i presidentit dukej se paralajmëroi një pikë kthese, me zyrën e Netanyahut që njoftoi se kishte miratuar kërkesën e Biden për të lejuar Egjiptin të dërgonte sasi të kufizuara ndihme humanitare në Rripin e Gazës./ /os/
