TEL AVIV, 13 dhjetor /ATSH-DPA/ – Ushtria izraelite po teston përmbytjen e tuneleve të përdorura nga grupi islamik Hamas nën Rripin e Gazës, raportojnë mediet amerikane.
”Uji i detit do të pompohet në disa tunele për të testuar nëse metoda është e përshtatshme për shkatërrimin në shkallë të gjerë të metrosë”, njoftoi televizioni amerikan CNN të martën, duke cituar një zyrtar amerikan të informuar për incidentin.
Për aktivitetin e IDF-së raportoi edhe gazeta amerikane ”The Wall Street Journal”.
Rrjeti i tunelit vlerësohet të jetë afërsisht 500 kilometra i gjatë.
Megjithatë, ushtria izraelite supozon se shumë nga 135 pengjet e rrëmbyer në Izrael po mbahen në tunele.
Izraeli kishte informuar Shtetet e Bashkuara se vetëm tunelet ku nuk dyshohej për pengje do të përmbyten.
Në një konferencë për shtyp, presidenti amerikan Joe Biden u pyet për përmbytjen e disa pjesëve të tunelit.
Ai u përgjigj “thuhet se …nuk ka pengje në asnjë nga këto tunele. Por, unë nuk e di këtë me siguri”.
Sipas ushtrisë izraelite, Hamasi ka ndërtuar një sistem të madh tunelesh nën Rripin e Gazës./ /os/
