TIRANË, 5 prill /ATSH/- Një tërmet i rrallë me magnitudë 4,7 ballë ka goditur shtetin amerikan, Nju Xhersi, sipas “Il Messaggero”.
Instituti Amerikan Gjeofizik tha se epiqendra e tërmetit me magnitudë 4,7 ishte 7 kilometra në verilindje të Stacionit Whitehouse në Nju Xhersi. Për momentin, nuk janë raportuar të vdekur apo dëme materiale.
Lëkundjet janë ndjerë edhe në Nju Jork, ku fenomene të këtij lloji janë mjaft të rralla dhe gjithashtu në Filadelfia.
Epiqendra e tërmetit ishte afërsisht gjashtë kilometra larg stacionit Whitehouse, pranë qytetit të Libanit.
Në Nju Jork tërmeti nuk shkaktoi ndonjë skenë të veçantë paniku mes qytetarëve, por disa dëshmitarë panë rrokaqiejt e Manhatanit të lëkundeshin.
“Ne nuk kemi ndjerë një tërmet kaq të fortë që nga viti 2011”, tha guvernatorja e Nju Jorkut, Kathy Hochul, duke shtuar se ekipe inxhinierësh ishin vendosur në terren për të vlerësuar gjendjen e urave dhe infrastrukturës, përfshirë metronë e qytetit.
Administrata Federale e Aviacionit të SHBA-së lëshoi një ndalesë tokësore në Aeroportin Ndërkombëtar “John F. Kennedy” të Nju Jorkut dhe Aeroportin Ndërkombëtar “Liberty” të Newark.
“Trafiku ajror mund të preket gjithashtu në Nju Jork, Nju Xhersi, Filadelfia dhe Baltimorë”, tha agjencia në një postim në platformën e mediave sociale X. //a.i/
