UASHINGTON, 13 tetor /ATSH-DPA/ – Presidenti i SHBA, Joe Biden tha se rezoluta e OKB-së, e propozuar nga SHBA dhe Shqipëria, kundër aneksimeve të Rusisë në Ukrainë, dhe e miratuar me një shumicë historike, ishte një mesazh për Moskën se ajo nuk mund të fshijë një shtet sovran nga harta.
“Sot, shumica dërrmuese e botës – kombe nga çdo rajon, i madh dhe i vogël, që përfaqësojnë një gamë të gjerë ideologjish dhe qeverish – votuan për të mbrojtur Kartën e Kombeve të Bashkuara dhe për të dënuar përpjekjen e paligjshme të Rusisë për të aneksuar territorin ukrainas me forcë”, tha Biden në një deklaratë.
“Aksionet e këtij konflikti janë të qarta për të gjithë – dhe bota ka dërguar një mesazh të qartë si përgjigje: Rusia nuk mund të fshijë një shtet sovran nga harta. Rusia nuk mund të ndryshojë kufijtë me forcë. Rusia nuk mund të kapë territorin e një vendi tjetër si të vetin”, tha Biden.
“Pothuajse tetë muaj pas kësaj lufte, bota sapo ka treguar se është më e bashkuar dhe më e vendosur se kurrë për ta kërkuar Rusinë përgjegjëse për shkeljet e saj”, shtoi lideri amerikan.
Asambleja e Përgjithshme e OKB-së dënoi dje masën e fundit të Rusisë për të aneksuar rajonet lindore të Ukrainës Donetsk, Kherson, Luhansk dhe Zaporizhzhya, me një votim 143-5, me 35 vende abstenuese./ a.jor.