Kryeministri i Mbretërisë së Spanjës Pedro Sanchez, mbajti një konferencë për shtyp me Kryeministrin e Shqipërisë Edi Rama. Teksa foli për Kosovën ai deklaroi se “Kosova” na ndan me Shqipërinë. Sipas tij, me pavarësinë e njëanshme u shkel e drejta ndërkombëtare.
“Miqtë e mirë si Shqipëria dhe Spanja mund të kenë dhe mosmarrëveshjet e veta. Ne mendojmë se është deklaratë e njëanshme e pavarësisë dhe mendojmë se është shkelur e drejta ndërkombëtare prandaj nuk mund të jemi në favor të këtij pranimi. E themi me gjithë respektin që kemi popullin shqiptar. Është një opinion që ndahemi me Shqipërinë por kjo nuk do të thotë në kuadër të integrimit europian nuk nxisim dialogun Serbi – Prishtinë. Ky është pozicioni që kemi me Spanjën. Edhe miqtë e mirë mund të kenë diferencat apo kontradiktat mes njëri tjetrit”, tha ai.
Kryeministri i Spanjës Pedro Sanchez gjatë vizitës së tij zyrtare, deklaroi se nuk mund të konceptohet Bashkimi Evropian pa Ballkanin Perëndimor.
“E vlerësoj kryeministrin Rama, jo vetëm nga mënyra se si shprehet, por për të gjithë angazhimet e tij evropiane, dhe sigurisht për formën me të cilën vepron dhe bënë politikë, të cilat janë hapa shumë të rëndësishëm të Shqipërisë në planin ndërkombëtar. Dua të kujtoj se më pak se një vit ne jemi takuar me kryeministrin Rama në Madrid, që ishte hera e parë e kryeministrit shqiptar në Spanjë dhe tani është hera e parë e kryeministrit spanjoll në Shqipëri”, tha ai.
Sanchez tha se, lufta në Ukrainë nuk do t’i ndryshojë kurrë vlerat evropiane që na bashkojnë.
“Është e vërtetë që atëherë bota ishte ndryshe, 24 shkurti na ndryshoi hapat. Invazioni rus në Ukrainë prek të gjithë integritetin territorial dhe vë në dyshim jo vetëm të Ukrainës, por të gjithë rendin ndërkombëtar, na ka dhënë shumë probleme dhe shqetësime kjo luftë. Kjo luftë në Evropë nuk do t’i ndryshojë kurrë vlerat që na bashkojnë dhe unë besoj se kjo luftë vetëm ka treguar fortësinë e BE-së, rrugë të cilën duhet ta ndjekim për t’i bërë ballë këtyre pasojave”, tha ai.
