KREMLIN, 1 janar /ATSH-DPA/ – Disa ditë pas bombardimeve të rajonit kufitar rus të Belgorodit, i cili la më shumë se 20 të vdekur, presidenti rus Vladimir Putin njoftoi sulme të mëtejshme hakmarrëse ndaj Ukrainës fqinje.
”Me siguri e keni vënë re që janë kryer sulme të tilla”, tha ai në ditën e Vitit të Ri, në një takim me ushtarët e plagosur rusë në një spital ushtarak në Moskë.
“Dhe më shumë po kryhen sot dhe ne do ta bëjmë këtë edhe nesër”, shtoi ai.
Në reagimin e tij të parë ndaj bombardimeve të Belgorodit të shtunën e kaluar, Putin foli gjithashtu për një “akt terrorizmi” nga ushtria ukrainase.
Megjithatë, në fjalimin e tij, i cili u transmetua nga mediat shtetërore, Putin nuk përmendi se kësaj breshërie i ka paraprirë vala më e rëndë e sulmeve ruse kundër Ukrainës që nga fillimi i luftës.
Sipas raporteve të Ukrainës, më shumë se 45 njerëz u vranë të premten e kaluar, pjesërisht për shkak se zonat e banuara u vunë nën zjarr në shumë vende.
Megjithatë, gjatë takimit të tij me ushtarët, Putin përsëriti pretendimin e zakonshëm të propagandës ruse se ushtria e saj gjoja po synonte vetëm objektet ushtarake në Ukrainë.
Me 24 të vdekur dhe më shumë se 100 të plagosur, sulmi në Belgorod ishte hera e parë që Rusia kishte pësuar një numër kaq të lartë të viktimave civile në luftën e saj dyvjeçare kundër Ukrainës.
Megjithatë, kjo ende nuk ka asnjë lidhje me numrin e viktimave në Ukrainë.
Sfondi i sulmit në Belgorod gjithashtu mbetet i paqartë./ a.jor.