Ditën e djeshme fjalimin e tij drejtuar kombit, presidenti rus Vladimir Putin e ktheu në mënyrën për t`i përcjellë Perëndimit një mesazh të fortë: Dërgimi i trupave të NATO-s në Ukrainë, do të ketë pasoja tragjike.
“Rusia ka armë, të cilat mund të godasin territorin e tyre. Por është retorika perëndimore që po kërcënon një konflikt me përdorim armësh atomike. E gjithë kjo rrit kërcënimin real të një konflikti bërthamor që nënkupton shkatërrimin e njerëzimit”, u shpreh Putin.
Megjithatë, NATO nuk do të ishte e papërgatitur për mundësinë e vendosjes së armëve bërthamore taktike në Bjellorusi, edhe nëse arsenali është zvogëluar në mënyrë progresive gjatë dekadave. Ja ku dhe sa armë ka.
SHBA vendosi armët e saj bërthamore në bazat e NATO-s pas përfundimit të Luftës së Dytë Botërore, duke filluar në vitet 1950.
Sipas CFR, Këshilli për Marrëdhëniet me Jashtë (një qendër studimore amerikane e specializuar në politikën e jashtme), armët taktike bërthamore të markës amerikane janë të vendosura në gjashtë baza në pesë vende anëtare të Aleancës: Belgjikë, Gjermani, Itali, Holandë dhe Turqi. Mbretëria e Bashkuar dhe Franca, kanë forcat e tyre bërthamore, por nuk kanë më armë amerikane.
Sipas disa ekspertëve, Shtetet e Bashkuara mund të kenë rreth njëqind bomba bërthamore të vendosura në këto gjashtë vende. Megjithatë, arsenali është zvogëluar gjatë viteve pas disa marrëveshjeve për armët bërthamore, veçanërisht falë Traktatit të Forcave Bërthamore me Rreze të Mesme (INF) në 1987 midis Uashingtonit dhe Moskës.
Arsenali bërthamor i SHBA-së në Evropë përbëhet tërësisht nga bomba të gravitetit B61, të dizajnuara për t’u hedhur nga bombarduesit aleatë ose avionët luftarakë. Në shërbim për më shumë se 50 vjet, B61, sipas faqes së internetit të CFR, është arma e fundit taktike bërthamore që ende zotërohet nga SHBA.
Prania e armëve bërthamore në tokën evropiane u vendos për të qetësuar anëtarët e NATO-s, gjatë viteve të Luftës së Ftohtë , në rast të një sulmi të konsideruar shumë të mundshëm nga Bashkimi Sovjetik.
Moska ka raketa balistike ndërkontinentale , nëndetëse dhe bombardues të rëndë. Këto armë janë të vendosura në vende të ndryshme ushtarake në territorin e saj të madh. Megjithatë, analistët nga disa vende të BE-së kanë ngritur prej kohësh dyshime për praninë e armëve bërthamore në Kaliningrad, enklava ruse midis Polonisë dhe Lituanisë. Zyrtarisht, Moska e ka mohuar gjithmonë këtë, megjithëse, sipas CFR, një zyrtar i qeverisë ruse në vitin 2018 konfirmoi dërgimin e raketave Iskander me aftësi bërthamore në Kaliningrad.
Top Channel
