Të gjitha vendet që duan të anëtarësohen në Bashkimin Evropian duhet të vazhdojnë luftën kundër korrupsionit, tha sot kryetari i Komisionit të Jashtëm të Bundestagut gjerman, Mihael Roth, para fillimit të Konferencës “Përparimi i Procesit të Berlinit përmes Demokracisë Parlamentare”, që po mbahet në Kuvend.
Roth i është përgjigjur pyetjes së një gazetari në lidhje me miratimin e shpejtë të ndryshimeve në Kodin Penal, të cilat shkaktuan reagime në opinion për shkak të uljes së dënimeve për bartësit e funksioneve publike në rastet e shpërdorimit të detyrës zyrtare, ndaj ka edhe pretendime se është një amnisti dhe një marrëveshje e heshtur mes qeverisë dhe opozitës, në këmbim të mbështetjes për ndryshimet kushtetuese.
“Nuk është koha për të shantazhuar njëri-tjetrin, ka pritshmëri të qarta nga BE-ja, sepse mbi të gjitha ne jemi një Union i vlerave të përbashkëta, në një treg të përbashkët dhe të gjitha vendet që duan të anëtarësohen në BE duhet të vazhdojnë luftën kundër korrupsionit”, tha Roth.
Ai theksoi se nuk dëshiron të hyjë në detaje për ndryshimet në Kodin Penal, përmendi se ka dëgjuar edhe zërat për amnisti, por theksoi se për këtë duhet të vendosin politikanët në vend.
“Por tani po flasim për ndryshimin e Kushtetutës, e cila i referohet pakicës bullgare dhe çështjeve të tjera, të cilat janë rezultat i një procesi shumë të gjatë, të tensionuar dhe të diskutueshëm të negociatave me BE-në, veçanërisht me Bullgarinë. Qëllimi im kryesor është të shpejtoj negociatat mes BE-së dhe Maqedonisë së Veriut, sepse banorët e Maqedonisë meritojnë anëtarësimin në BE sa më shpejt të jetë e mundur. Ne kemi nevojë për më shumë ambicie nga të nëntë palët, si nga BE-ja ashtu edhe nga vendi”, tha Roth.
MARKETING
