Duket se fitorja përballë Juventusit në Torino ka rikthyer në shina Interin, që mposht bindshëm 2-0 në “San Siro” Veronën dhe shton presionin ndaj Napolit dhe Milanit kryesues (aktualisht diferenca me kuqezinjtë është 1 pikë).
Djemtë e Inzaghit bëjnë një pjesë të parë thuajse perfekte dhe mbyllin në avantazh të dyfishtë këtë fraksion loje. Verona reagon në pjesën e dytë dhe ka disa mundësi për të rihapur sfidën, por Handanovic është i pakalueshëm.
Interi merr një fitore të çmuar në garën për titullin kampion dhe pas këtij suksesi shton presionin te Napoli e Milani që luajnë nesër ndeshjet respektive të javës së 32-të të Serie A.
Interi zhvillon një pjesë të parë shumë të mirë, në limitet e perfektes në “San Siro” përballë Veronës. Zikaltërit dominojnë totalisht sfidën dhe arrijnë të mbyllin 45 minutat e para në avantazh të dyfishtë.
Ndeshjen e zhbllokon Barella, ndërsa Dzeko shënon golin e dytë dhe në të dyja rastet asisti vjen nga këmbët e Perisic. Verona rrezikon vetëm një herë me Simeone, por Handanovic nuk lejon që porta e tij të preket. De Vrij ka një problem muskulor dhe zëvendësohet nga D’Ambrosio në pjesën e dytë.
Interi nis me të njëjtin ritëm edhe pjesën e dytë dhe rrezikon me Dumfries, por gjuajtja e tij përfundon jashtë. Miqtë përgjigjen me Ceccherinin, që nuk arrin të godasë në shenjë nga një pozicion i mirë.
Verona merr zemër dhe rrezikon me Simeonen, por Handanovic është i pakalueshëm. Provon edhe Lasagna për veronezët por nuk arrin që të shënojë.
Skenën e rimerr sërish Interi që i afrohet golit të tretë me Calhanoglu, ndërsa D’Ambrosio ndalet nga shtylla dhe portieri Montipo. Verona provon të rihapë ndeshjen me Ilic, por Skriniar devijon topin larg portës.
Zikaltërit menaxhojnë minutat e mbetura dhe arrijnë të marrin një fitore me vlera 2-0, që i mban në garën për titullin kampion. Verona u zgjua vonë, por skuadra e Tudor e ka arritur objektivin e saj sezonal.
Foto: Inter Twitter