Sigal Prishtina me mund të madh është kualifikuar në gjysmëfinale të “Final 8” të Ligës Unike.
Të enjten mbrëma në Vlorë, Prishtina triumfoi ndaj Besëlidhjes me rezultatin e ngushtë 80:79.
Në fakt, Prishtina fitoren e siguroi në fund të takimit kur Donte Clark shënoi për tre pikë për rezultatin 80:78 kur kishin mbetur vetëm edhe pesë sekonda lojë. Në aksionin e fundit, Besëlidhja fitoi dy gjuajtje të lira prej të cilës realizoi vetëm njërën, ndërsa njëri prej lojtarëve të ekipit nga Shqipëria nuk doli I saktë në tentimin e fundit.
Kjo fitore e Prishtinës erdhi me mund të madh pasi vetëm në fund të takimit doli në epërsi ndaj Besëlidhjes.
Ekipi nga Shqipëria gjatë tërë kohën ka qenë në avantazh pasi çerekun e parë e mbylli me shifrat 28:9. Në fillim të çerekut të dytë, Besëlidhja kishte epërsi prej 22 pikëve (35:13) por që nuk arriti ta mbajë deri në fund. Prishtina e fitoi këtë çerek si dhe dy periudhat e fundit për t’u kualifikuar në gjysmëfinale.
Donte Clark ishte më efikasi te Prishtina me 23 pikë të shënuara, 6 kërcime e 4 asistime, ndërsa me lojë të mirë u veçua edhe Diamond Stone (26 pikë).
Te Besëlidhja u dallua Julian Hamati që regjistroi “double-double” prej 24 pikëve e 17 kërcimeve.
Në serinë gjysmëfinale të këtij turne, do të përballen të gjitha skuadrat nga Kosova ndërmjet veti pasi i eliminuan ato të Shqipërisë në çerekfinale.
Në gjysmëfinale, Prishtina do të përballet me Trepçën, ndërsa në duelin tjetër do të luajnë Ylli me Pejën.
Gjysmëfinalet e Ligës Unike zhvillohen të premten, njëra prej orës 16:00 dhe tjetra në orën 19:00.
