PRAGË, 9 shtator /ATSH-DPA/- Gjermania dhe katër vende të tjera të BE-së do të fillojnë zbatimin e një takse minimale globale për kompanitë e mëdha pa mbështetjen e Hungarisë nëse do të jetë e nevojshme, njoftuan sot ministrat e Financave në Pragë.
“Një taksë minimale globale do të jepte një kontribut të rëndësishëm në adresimin e ndjenjës së drejtësisë së njerëzve,” tha ministri gjerman i Financave, Christian Lindner, duke folur pranë ministrave të Financave të Francës, Spanjës, Italisë dhe Holandës.
“Korporatat ndërkombëtare duhet gjithashtu të japin kontributin e tyre në financimin e komunitetit”, tha Lindner gjatë një takimi të ministrave të Financave të BE-së, duke shtuar se taksa do t’i lejonte Gjermanisë të vepronte pa rritur taksat e tjera.
“Njerëzit duan drejtësi dhe kanë të drejtë. Unë nuk dua të kem më asnjë evazion fiskal në Evropë”, tha më herët ministri francez i Financave, Bruno Le Maire.
Taksa minimale synon të ndalojë korporatat e mëdha që të lëvizin fitimet në rajone me taksa më të ulëta dhe që bizneset shumëkombëshe të paguajnë më shumë taksa atje ku operojnë.
Mbi 130 vende, vitin e kaluar nënshkruan marrëveshjen e madhe tatimore të organizuar nga Organizata për Bashkëpunim Ekonomik dhe Zhvillim (OECD).
BE-ja, që atëherë është përpjekur ta kthejë atë në ligj, por nuk ka arritur të marrë mbështetje nga Hungaria, e vetmja nga 27 anëtarët e bllokut që bllokon një rrugë të përbashkët për të ecur përpara.
“Nëse nuk mund të arrihet konsensus mes të gjitha vendeve të BE-së, Gjermania do të ishte e gatshme të zbatonte taksën në vitin 2023”, tha Lindner.//a.i/