Politika serbe vazhdon të përzihet në sport, dhe atë duke diskriminuar sportistët nga Kosova.
Rasti i fundit ndodhi me pingpongistët, të cilëve iu mohua pjesëmarrja me të drejta të barabarta me shtetet tjera në Kampionatin Evropian të Pingpongut U-21, që po mbahet në Beograd të Serbisë.
Në lidhje me këtë ngjarje, ka reaguar Komiteti Olimpik i Kosovës duke e dënuar këtë veprim nga ana e Serbisë. KOK-u gjithashtu ka bërë thirrje që të reagojë edhe Federata Evropiane e Pingpongut (ETTU) dhe të marrë masat e nevojshme ndaj organizatorit.
“KOK shpreson që Federata Evropiane e Pingpongut (ETTU), të marrë masat e nevojshme ndaj organizatorit të Evropianit, në këtë rast Serbisë, me besimin se diskriminimet e tilla do të marrin fund një herë e përgjithmonë”, thuhet në reagimin e KOK-ut.
