Ministrat e financave dhe shëndetësisë të 20 ekonomive më të mëdha të botës (G20) kanë thënë se do të ndërmarrin hapa për të vaksinuar 70 për qind të popullsisë së botës kundër COVID-19 deri në mesin e vitit 2022 dhe kanë krijuar një grup pune për të luftuar pandemitë e ardhshme.
Ministrat nuk arritën të bien dakord për një instrument financiar të veçantë të propozuar nga SHBA dhe Indonezia, por thanë se grupi i punës do të shqyrtonte opsionet për mobilizimin e fondeve për të rritur gatishmërinë ndaj pandemisë.
“Për t’iu afruar qëllimeve globale të shkallës së vaksinimit të të paktën 40 për qind të popullsisë në të gjitha vendet deri në fund të vitit 2021 dhe 70 për qind deri në mesin e 2022, ne do të ndërmarrim hapa për të forcuar furnizimin me vaksina dhe ilaçe thelbësore dhe investimet në vendet në zhvillim dhe për të hequr kufizimet përkatëse të furnizimit dhe financimit,” tha deklarata e përbashkët e G20 për Reuters.
Qëllimi i mëparshëm ishte vaksinimi i 70 për qind të popullsisë së botës deri në vjeshtën e vitit 2022.
G20 krijoi gjithashtu një grup pune për të luftuar pandemitë e ardhshme pasi pandemia COVID 19 zbuloi “mangësi të rëndësishme” në aftësinë e botës për të koordinuar përgjigjen e saj.
Grupi i punës u krijua për të forcuar dialogun dhe bashkëpunimin global për çështjet që lidhen me parandalimin e pandemisë, gatishmërinë dhe reagimin ndaj pandemisë, thuhet në deklaratë.
Ministrat e G20 bënë thirrje gjithashtu për forcimin e qëndrueshmërisë së zinxhirëve të furnizimit përmes qendrave vullnetare të transferimit të teknologjisë në rajone të ndryshme si qendrat e reja të mRNA në Afrikën e Jugut, Brazil dhe Argjentinë, dhe përmes prodhimit të përbashkët. /tesheshi.com/
