Absolutisht nuk bëhet fjalë për kurrfarë zbulimi ose skandal të ri i cili ishte publikuar nga ana e Hristian Mickoski. Akuzat dhe dokumentet të cilët ishin publikuar janë pjesë e dokumentacionit i cili që nga fillimi u janë dorëzuar të gjitha organeve hetuese. Dokumentacioni i njëjtë i është dorëzuar në tërësi edhe Komisionit Anketues, thuhet në reagimin e Klinikës së Radioterapisë dhe Onkologjisë në Shkup për akuzat e thëna nga lideri i VMRO-DPMNE-së në konferencën e djeshme për media.
“Sa i përket akuzave konkrete, dëshirojmë t’i hedhim poshtë plotësisht akuzat. Së pari, për furnizimin e parakohshëm të ilaçeve dhe akuzat se referencat negative nuk u janë dhënë qëllimisht kompanive të furnizimit, faktet janë si më poshtë. Klinika tërheq sasi të ilaçeve nga furnitorët, kryesisht në baza mujore. Për shkak të nevojave të shtuara dhe pacientëve të rinj, shpesh ndodh që shumat e tërhequra të shpenzohen më shpejt dhe të shpenzohen më herët se sa ishte planifikuar. Në këto raste, furnitorëve u duhet kohë për të ofruar sasi të reja. Kjo nuk mund të jetë objekt i referencës negative. Arsye shtesë për disa barna është mungesa globale apo rajonale, e cila është dukuri e zakonshme gjatë dhe pas pandemisë”, thuhet në reagimin e ISH KU e Radioterapisë dhe Onkologjisë – Shkup.
Si të pabazë dhe të gabuar, nga Onkologjia e vlerësojnë akuzën se në Klinikë janë furnizuar ilaçe në rezerva. Thonë se sasia për të cilën akuzohet se ishte tepricë e rezervave, jo vetëm që nuk është rezervë por ishte nevojë dhe është në sasi për një numër të vogël të pacientëve, edhe atë nga njëri ilaç vetëm për 9 pacientë nga ilaçi tjetër për 5 pacientë.
“Për njërin nga ilaçet (Abirateron) aspak nuk ka pasur rezerva dhe na vjen keq që me informacione të tilla të pasakta manipulohet publiku. Praktika e tillë e menaxhimit me ilaçet e KURO është e nevojshme dhe e duhur që të mos ketë vonesa në dhënien e terapisë, derisa të përfundojnë procedurat për furnizime të reja. Edhe një herë bëjmë thirrje dhe lusim që të ndërpritet politizimi i procesit gjyqësor dhe njollosja e Klinikës. Klinika është transparente dhe është e hapur për të gjitha institucionet për këtë rast, duke përfshirë edhe Komisionin Anketues. Prezantimet e tilla politike për manipulimin e dokumentacionit i cili nuk është fshehtësi, e as që është fshehur janë vetëm përpjekje për keqpërdorim të KURO-s për qëllime politike ditore”, qëndron në reagimin e Klinikës së Radioterapisë dhe Onkologjisë në akuzat e djeshme të liderit të VMRO-DPMNE-së, Hristian Mickoski.
