NJU JORK, 25 mars /ATSH-DPA/ – Gati gjashtë muaj pas fillimit të luftës në Gaza, Këshilli i Sigurimit i Kombeve të Bashkuara miratoi për herë të parë një rezolutë që bën thirrje për një “armëpushim të menjëhershëm” për muajin e shenjtë mysliman të Ramazanit.
Organi më i fuqishëm i Kombeve të Bashkuara shprehu “shqetësim të thellë për situatën katastrofike humanitare në Rripin e Gazës”.
Ai gjithashtu bën thirrje për ‘’lirimin e menjëhershëm dhe të pakushtëzuar të të gjithë pengjeve të mbajtura nga organizata militante palestineze Hamas’’.
Shtetet e Bashkuara, të cilat kanë të drejtën e vetos, abstenuan nga votimi, duke lejuar miratimin e rezolutës.
Pro votuan 14 anëtarët e tjerë të komisionit.
Rezoluta, e detyrueshme sipas ligjit ndërkombëtar, rrit më tej presionin ndërkombëtar ndaj palëve në konflikt, Izraelit dhe Hamasit.
Megjithatë, është e paqartë se deri në çfarë mase rezoluta do të ketë ndikim në vendimet e qeverisë izraelite të kryeministrit Benjamin Netanyahu ose Hamasit në lidhje me zhvillimin e mëtejshëm të luftës.
Menjëherë para votimit, Netanyahu kërcënoi se ”do të anulonte me një njoftim të shkurtër udhëtimin e planifikuar të dy prej të dërguarve të tij në Uashington nëse Shtetet e Bashkuara nuk përdorin të drejtën e vetos për të parandaluar rezolutën”./ /os/
