NJU JORK, 24 prill /ATSH/ – Kompania TikTok thotë se do të kundërshtojë një ligj jokushtetues, sipas saj, në gjykatë që mund të rezultojë në shitjen ose ndalimin e tij në Shtetet e Bashkuara të Amerikës, shkruan BBC.
Presidenti Biden ka nënshkruar një projektligj që i jep pronarit kinez të platformës së mediave sociale, ByteDance, nëntë muaj kohë për të hequr aplikacionin ose do të bllokohet në Shtetet e Bashkuara.
Ligji u prezantua mes shqetësimeve se TikTok mund të ndajë të dhënat e përdoruesve me qeverinë kineze, pretendime që ajo i ka mohuar gjithmonë.
“Ne besojmë se faktet dhe ligji janë qartësisht në anën tonë dhe se përfundimisht do të mbizotërojmë”, tha TikTok në një deklaratë.
“Fakti është se ne kemi investuar miliarda dollarë për të mbajtur të dhënat e SHBA-së të sigurta dhe platformën tonë të lirë nga ndikimi dhe manipulimi i jashtëm. Ky ndalim do të shkatërronte shtatë milionë biznese dhe do të heshtte 170 milionë amerikanë”, vazhdoi ai.
Masa u miratua si pjesë e një pakete prej katër projektligjesh që përfshinte gjithashtu ndihmën ushtarake për Ukrainën, Izraelin, Tajvanin dhe partnerët e tjerë të SHBA-së në rajonin Indo-Paqësor.
Ajo pati mbështetje të gjerë nga ligjvënësit, me 79 senatorë që votuan pro dhe 18 kundër.
“Për vite me rradhë ne kemi lejuar Partinë Komuniste Kineze të kontrollojë një nga aplikacionet më të njohura në Amerikë … i cili ka qenë jashtëzakonisht dritëshkurtër”, tha senatori Marco Rubio, republikani më i lartë në Komitetin e Inteligjencës.
“Një ligj i ri do ta detyrojë pronarin kinez të shesë aplikacionin. Ky është një veprim i mirë për Amerikën,” shtoi ai.
TikTok nga ana e tij tha se ‘’ByteDance nuk është një agjent i Kinës apo ndonjë vendi tjetër”.
ByteDance këmbëngul se nuk është një kompani kineze, duke treguar për firmat globale të investimeve që zotërojnë 60%./ /os/
