NJU JORK, 31 tetor /ATSH-DPA/ – Sekretari i përgjithshëm i Organizatës së Kombeve të Bashkuara, Antonio Guterres dëshiron të shpëtojë një marrëveshje për eksportet e grurit nga Ukraina nëpërmjet Detit të Zi, të cilën Moska e ka pezulluar pas sulmeve me dronë në flotën e saj në zonë.
”Guterres është thellësisht i shqetësuar dhe po kryen kontakte intensive me qëllim të heqjes së pezullimit të marrëveshjes”, theksoi zëdhënësi i OKB-së, Stéphane Dujarric pa hyrë në detaje.
”Sot, 12 anije do të niseshin përmes korridorit drejt Stambollit, ndërsa katër prej tyre pritej të lëviznin në drejtim të kundërt në një lëvizje të koordinuar me delegacionin rus”, tha qendra e koordinimit në një deklaratë.
Të shtunën, Moska anuloi marrëveshjen për transportin e grurit ukrainas nga portet e Detit të Zi “për një kohë të pacaktuar”, duke përmendur “sulme terroriste” në flotën e saj të Detit të Zi në Sevastopol.
Ushtria ruse tha se dronët, anije luftarake të telekomanduara, u nisën gjatë natës pranë qytetit port ukrainas të Odesës./ /os/
