Mertens dhe Napoli janë shumë pranë divorcit. Pas takimit privat mes belgut dhe presidentit De Laurentiis në fund të prillit, ku sulmuesit iu kërkua që të shkruante kërkesat e tij ekonomike për të vazhduar aventurën e tij me skuadrën “axurre”, tashmë ka ardhur përgjigjja e agjentëve të lojtarit.
Sipas asaj që shkruan “Il Mattino”, avokatët e Mertens kanë dërguar një e-mail ku kërkojnë një kontratë 2-vjeçare me pagë 2 milionë euro në sezon si dhe disa bonuse e komisione, pa lënë mënjanë edhe garancinë për një aktivizim më të madh se sezonin e kaluar.
Kërkesa e belgut bien në kundërshtim me politikat ekonomike të klubit dhe duket e tepërt për presidentin De Laurentiis, që është i gatshëm të paguajë maksimumi 1.5 milionë euro pagë. Ndarja duket e pashmangshme. / Oversport.tv
