MYNIH, 17 shkurt /ATSH-ANSA/ – Ka një nevojë jetike dhe urgjente që SHBA të vendosë për një paketë për Ukrainën, sepse Kievi ka nevojë për atë mbështetje, deklaroi sot sekretari i përgjithshëm i NATO-s, Jens Stoltenberg duke folur në Konferencën e Sigurisë në Mynih.
”Nëse shikoni mbështetjen për Ukrainën, aleatët evropianë e kanë dhënë atë, në
gjithsej, më shumë se Shtetet e Bashkuara të Amerikës”, theksoi Stoltenberg.
“Shtetet e Bashkuara të Amerikës kanë bërë shumë, por mungesa e një vendimi në Kongresin amerikan ka një ndikim të drejtpërdrejtë në frontin në Ukrainë”, shtoi ai.
Stoltenberg iu përmbajt idesë se Shtetet e Bashkuara të Amerikës duhet të bëjnë thjesht atë që kanë premtuar.
“Çdo javë që kalon do të thotë që më shumë njerëz do të vriten në vijën e frontit në Ukrainë”, shtoi ai.
“Është e rëndësishme të themi se nuk shohim një kërcënim të menjëhershëm për çdo aleat të NATO-s”, i tha ndërkohë Stoltenberg gazetares së CNN-it, Christiane Amanpour në një intervistë./ a.jor.