Në një njoftim zyrtar, Agjencia për Ushqim dhe Mjekësi Veterinare ka konfirmuar se sëmundja e murtajës afrikane e derrave ka regjistruar një përhapje të konsiderueshme në zonat e Malit Sharr. Megjithatë, ende nuk ka asnjë shenjë të kësaj sëmundjeje te derrat shtëpiake në rajonin e Tetovës, sipas të dhënave të fundit.
“Murtaja afrikane e derrave nuk është regjistruar në popullatën e derrave shtëpiake në rajonin e Pollogut. Sëmundja nuk është zoonozë, domethënë virusi nuk është i rrezikshëm dhe nuk transmetohet te njerëzit, të cilët janë bartës të mundshëm të tij. Agjencia e Ushqimit dhe Veterinarisë urdhëroi kompanitë e gjuetisë që të kontrollojnë vendgjuetinë dhe të raportojnë menjëherë te veterineri zyrtar kompetent të gjithë derrat e egër të ngordhur të gjetur. Kërkimi i vendgjuetisë është një aktivitet jashtëzakonisht i rëndësishëm për zbulimin e hershëm të pranisë së virusit të murtajës afrikane të derrave. Pas raportimit për gjetjen e një derri të egër të ngordhur, veterineri zyrtar merr mostra për analiza laboratorike dhe urdhëron masa për asgjësimin e padëmshëm të derrit të egër të ngordhur”, njoftojnë Agjencia e Ushqimit dhe Veterinarisë.
Gjithashtu, në zonën e Parkut Kombëtar të Malit Sharr, është njoftuar se do të zhvillohet një fushatë e gjuajtjes së derrave të egër nga nëntori 2023 deri në fund të janarit 2024. Kjo masë ka për qëllim parandalimin e përhapjes së murtajës afrikane dhe do të implementohet në bashkëpunim me shoqëritë e gjuetisë dhe autoritetet lokale.
Për të siguruar kontrollin e situatës, çdo derr i ngordhur që do të gjendet do të nënshtrohet analizave laboratorike për të identifikuar praninë e virusit të murtajës afrikane. Në rast të rezultateve pozitive, veterinerët zyrtarë do të marrin masa të menjëhershme për asgjësimin e derrit të ngordhur, duke ndërmarrë hapa të rëndësishëm për parandalimin e përhapjes së sëmundjes në popullatën e derrave të egër.
